تم الكشف عن مانع الإعلانات

الإعلانات تساعدنا في تمويل موقعنا، فالمرجو تعطيل مانع الإعلانات وساعدنا في تقديم محتوى حصري لك. شكرًا لك على الدعم ❤️

المستشار عمرو موسي يكتب عن : منتصف العمر

المستشار عمرو موسي يكتب عن : منتصف العمر

منتصف العمر هي فتره صعبه جدا في عمر الانسان …ربما كانت الاصعب على الاطلاق..

هي الفتره من سن ال ٣٥ وصولا لل٤٨ وأحيانا لل٥٠ وفيه ناس بتستمر معاهم لل٥٥ عشان تتفوق باقتدار في امتدادها على فتره المراهقه ورغم كده محدش بيديها الاهتمام والتركيز والتفهم اللي بنحاول نديه للمراهقين…

منتصف العمر هو فتره احساس الانسان انه ابتدى يكبر ومرحلة الشباب بتنسحب من بين ايده وابتدى في مسار التقدم في السن عشان ينتقل من مرحله الشباب لمرحله النضج والتقدم في السن يليها العجز والشيخوخة …

هي الفتره اللي في بدايتها بيبتدي يلاحظ فيها علامات مفزعة زي ظهور تجاعيد خفيفة حول العين وشعرات بيضاء متناثرة تبتدي بالتدريج تكبر وتزيد كل يوم معلنه بإصرار عن تراجع فتره الشباب وبقوة…

هي الفتره اللي الناس بتبطّل تقول عليه شاب او آنسه وبتستبدلها بلفظة راجل او استاذ او مدام وساعات حاج او حاجة..

هي الفتره اللي الانسان رغم انه حاسس انه لسه صغير من جواه ولسه احساسه بنفسه ومشاعره الداخليه هي هي بيلاقي فجأه شاب كبير او مودموزيل حلوة في ثانوي او الجامعة بتقوله يا انكل او يا عمو او يا طنط في اشاره صادمة انه خلاص ما بقاش شاب…

هي الفتره اللي بيلاقي فيها ولاده اللي أنجبهم في منتصف العشرينات أصبحوا مراهقين ومراهقات وشبان وشابات وأصبحوا همه ابطال القصة وهو بيلعب دور الاب او الام بعد ما كان هو البطل…

هي فترة عدم اتزان تام في المشاعر والرغبات والأحاسيس وهي الفتره اللي بنسمع فيها كتير عن قصص الطلاق والزواج التاني والخيانه الزوجيه لناس متجوزين وكانوا مستقرين بقالهم اكتر من عشر سنين…

هي فتره كتير فيها من النساء والرجال بيحاولوا يغيروا في شكلهم ويعملوا نيو لوك ويخسوا ويصبغوا شعرهم في إشارات سافره لرفضهم النفسي الداخلي لفكره التقدم في العمر وتخلّي الشباب عنهم..

هي فتره رغم انه في ناس كتير فيها بيبقوا لسه محافظين على شكلهم ووزنهم واناقتهم ويمكن ما يدوش سنهم خالص لكن احساسهم الداخلي بيبقى فيه خوف او اضطراب او عدم استقرار او تخوف…

هي فتره الانسان بيلاقي فيها في شغله انه بقى over qualified وانه المستقبل والعزم والبركة والهمة في الشباب وانه ممكن يتفك في شغله باتنين شباب ممكن ينجزوا شغله بنص مرتبه او يكتشف انه قرب يطلع معاش وكأن الدنيا بتقول له متشكرين كفايه عليك كده…

هي فتره صعبه جدا…اصعب بكتير من المراهقة …لان المراهق بيبقى بيأمل في الشباب والخروج من مرحلة الطفوله وعنده امل في اللي قدام…بينما الشخص في منتصف العمر وعلى العكس تماما بيبقى عايز يوقف عقارب الزمن عشان الشباب ما يروحش والعمر ما ينقضيش ويتسرق ويلاقي نفسه في السبيل للانضمام لصفوف كبار السن ومتاعب الشيخوخة بكل ما تحمله من ضعف ووهن ومرض ووحده احيانا…

رفقا بمن هم في منتصف العمر…فهم يحتاجون الرفق والتفهم والمساندة….

تعليقات الفيسبوك

الرابط المختصر :

إترك تعليق

البريد الالكتروني الخاص بك لن يتم نشرة . حقل مطلوب *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

الإنضمام للجروب
صفحتنا على الفيسبوك
الأكثر قراءة
مختارات عالم الفن
شخصيات عامة